એનએસઇનો ઇન્ડેક્સ નિફ્ટી 10,000ના જાદુઈ આંકને અડુંઅડું થઈ રહ્યો છે. નિફ્ટી 10,000ને પાર કરે તે પછી આપણે સાવધ બનવાની જરૂર પડી શકે છે, કારણ કે વેલ્યુએશન કે અર્નિંગ રિકવરીથી હાલની તેજીને ન્યાયી ઠેરવ શકાય તેમ નથી.

આપણને કોર્પોરેટ અર્નિંગમાં હજુ રિકવરી જોવા મળી નથી અને જીએસટી બાદ તેમાં વધુ બે ક્વાર્ટરનો સમય લાગી શકે છે. જોકે હાલનું બજાર શોર્ટ પોઝિશન માટેનું નથી, કારણ કે ટૂંકા ગાળાનો ટ્રેન્ડ પોઝિટિવ છે અને દરેક મોમેન્ટમ ઇન્ડિકેટર્સ માત્ર તેજીનો સંકેત આપે છે.

ટૂંકા ગાળા માટે બજાર મોમેન્ટમની સામે વેલ્યુએશનની અવગણના કરી રહ્યું હોય તેમ લાગે છે અને તે આ પોઝિટિવ મોમેન્ટમ કેટલું લાંબું ચાલશે તેની ગણતરી કરવાનું મુશ્કેલ છે. સાવધ બનવું એટલે કે થોડો નફો બુક કરવો તથા અતિઉત્સાહમાં ન આવી જવું અને ખાસ કરીને મિડ-કેપ અને સ્મોલ-કેપ શેરોમાં મોમેન્ટમનો પીછો ન કરવો. હાલના તબક્કે ક્યાં રોકાણ કરવું તે જાણવાનું રોકાણકારો માટે મુશ્કેલ છે.

અમને સિસ્ટેમેટિક ઇન્વેસ્મટેન્ટ પ્લાન (એસઆઇપ)ના વૈકલ્પિક સ્વરૂપ મારફત રોકાણ પસંદ છે. આ માધ્યમ મારફત રોકાણ ચાલુ રાખવું જોઈએ અને હાલના તબક્કે બજારમાંથી સીધી ખરીદી કરવા માટે વેલ્યુએશનનો કોઈ સપોર્ટ નથી. તાજેતરની તેજીનું એક મુખ્ય કારણ સેબીનો નિર્ણય છે. ફંડામેન્ટલને કારણે આ ખરીદી આવી ન હતી. સેબીએ ડેરિવેટિવ્ઝ અંગે પરિપત્ર જારી કર્યા બાદ મોટા પાયે શોર્ટ કવરિંગ થયું હતું. જો તમામ શોર્ટનું કવરિંગ થઈ જશે તો કરેક્શનના તબક્કા દરમિયાન બજારમાં સ્થિરતા માટે શોર્ટ કવરિંગ બાકી રહેશે નહીં.

ફાર્મા શેરોમાં નોંધપાત્ર મૂલ્ય છે. જોકે ટૂંકા ગાળા માટે મુશ્કેલી આવી શકે છે. અમે લાર્જ-કેપ ફાર્મા શેરોમાં બાજી લગાવવાનું પસંદ કરીએ છીએ. આઇટી ક્ષેત્ર પડકારોનો સામનો કરી રહ્યો છે, પરંતુ એસઆઇપી મારફત રોકાણ કરી શકાય છે. સમગ્ર આઇટી ક્ષેત્ર નીરસ લાગે છે, પરંતુ જો વ્યાજદરમાં ઘટાડો થશે તો આ શેરોમાં ફરી રસ ઊભો થઈ શકે છે.
અમે લાંબા ગાળા માટે ભારતના ઇક્વિટી માર્કેટ માટે બુલિશ છીએ, પરંતુ અમે મિડ-કેપ અને સ્મોલ-કેપ કંપનીઓમાં તેજીના પરપોટા અંગે નાના રોકાણકારોને સાવધ રહેવાની ભલામણ કરીએ છીએ.

स्त्रोत -इकनोमिक टाइम्स