कोहिमा : नागलँडच्या राजकारणात आज राजकीय नाट्य रंगले. अल्पमतात गेलेले मुख्यमंत्री शुरहोजेली लिजियात्सू आज विधानसभेत विश्वासदर्शक ठरावावेळी बहूमत सिद्ध करण्यासाठी आलेच नाही. त्यामुळे राज्यपालांनी टी.आर. जेलियांग यांच्याकडे मुख्यमंत्रीपदाची सुत्रे सोपविली. मुख्यमंत्र्यांनी विधानसभेत बहूमत सिद्ध न केल्याने दुसरा मुख्यमंत्री नियुक्त करण्याची देशातील ही पहिलीच वेळ आहे.

सत्ताधारी नागालँड पिपल्स फ्रंटच्या आमदारांनी मुख्यमंत्री लिजियात्सू यांच्याविरोधात बंड पुकारले होते. त्यामुळे लिजियात्सू सरकार अल्पमतात आले होते. राज्यपाल पी. बी. आचार्य यांनी मंगळवारी विधानसभा अध्यक्ष इम्तिवपांग यांना विधानसभेचे विशेष अधिवेशन बोलावण्याचे आदेश दिले होते. लिजियात्सू यांनी बहूमत सिद्ध करावे यासाठी हे अधिवेशन बोलावण्याचे आदेश देण्यात आले होते. मात्र लिजियात्सू विधानसभेत आलेच नाही. मुख्यमंत्री विधानसभेत नसल्याने विश्वासदर्शक ठराव मांडता येत नसल्याचं विधानसभा अध्यक्षांनी यावेळी स्पष्ट केलं. त्यानंतर विधानसभा अध्यक्षांनी विधानसभेचं कामकाज अनिश्चित काळासाठी स्थगित केलं आणि विधानसभा कामकाजाचा अहवाल राज्यपालांना सादर केला. त्यानंतर नागालँड पिपल्स फ्रंटच्या आमदारांनी जेलियांग यांना नेता निवडून राज्यापालांना तसे निवेदन दिले. त्यामुळे राज्यापालांनी जेलियांग यांच्याकडे सत्तेची सुत्रे सोपवून त्यांना २२ जुलैपर्यंत बहूमत सिद्ध करण्यास सांगितले.

दरम्यान, राज्यपालांनी बहूमत सिद्ध करण्याचे आदेश दिल्यानंतर मुख्यमंत्री लिजियात्सू यांनी न्यायालयात धाव घेऊन या आदेशाला स्थगिती देण्याची विनंती. मात्र न्यायालयाने त्यांची याचिका फेटाळून लावली होती.